RINDU KAMPUNG

Karya : Frisky A.S. Tandaju

Di kampung
Samua orang rupa sudara
Cuma birman kala-kala basudara
Biar nyanda kakak ade
Baku pangge kakak deng ade

Di kampung
Kiri kanan baku tegor
Baku dapa baku hormat
Orang lewat pangge makang
Biar nda kenal pangge ba singga

Di kampung
Helekan sayor baku berbage
Garam deng rica cuma baku minta
Ada kalebean kase pa sudara
Datang kasusaan sudara baku tulung

Di kampung
Skarang so berobah
Sampe sudara lupa sudara
Gara-gara berbage budel
Kakak deng ade baku angka sabel

Di kampung
Orang jaha so lebe banya
Orang lewat ba pajak akang
Ba hormat malam balas deng pemai
Orang nda kenal pukul dulu baru tanya

Di kampung
So nyanda rupa dulu
Gara-gara doi orang lebe gila
Helekan sudara bole orang jual
Apa lagi nyanda sudara

Di kampung
Skarang kasiang kita so rindu
Supaya bole sama deng dulu
Baku malo deng baku hormat
Baku bae deng baku bantu

(For : Pinabetengan desa tercinta)